“Ipak yo‘li me’moriy merosi: yodgorliklarni katalogizatsiya va ta’mirlash bo‘yicha xalqaro tajriba” mavzusidagi xalqaro ilmiy-amaliy seminar yakunlandi.

2025-yil 15–16-avgust kunlari Turizm va madaniy meros xalqaro universiteti huzuridagi "Ipak yo'li" xalqaro tadqiqot instituti tomonidan tashkillashtirilgan memoriy merosga oid xalqaro tadbirlar dekadasi doirasida bo‘lib o‘tgan ilmiy-amaliy seminar o‘z ishini muvaffaqiyatli yakunladi. Mazkur seminar 12 ta mamlakatdan tashrif buyurgan yetakchi mutaxassislar, restavratorlar, tarixchilar, madaniy merosni saqlash bo‘yicha olimlar ishtirokida yuqori ilmiy saviyada tashkil etildi va o’tkazildi. Seminar davomida Ipak yo’li me’moriy obidalarini kataloglashtirish, ularni asrash, restavratsiya qilish va shu sohada zamonaviy texnologiyalarni qo‘llash bo‘yicha ilg‘or xalqaro tajribalar almashildi. Seminar nafaqat ilmiy hamkorlikni mustahkamlash, balki madaniy merosni asrab-avaylash borasida kelajakdagi yangi ilmiy izlanishlar hamda ularni amaliyotga tadbiq etishga zamin yaratdi.